СӨ Национальнай бибилэтиэкэтигэр норуокка Дэлэгээт Уйбаан диэн аатынан биллибит, Бастакы Амма улууһун Сулҕаччы нэһилиэгэр өрөспүүбүлүкэҕэ аан бастакынан тэриллибит “Тэҥнэбил” артыал бэрэссэдээтэлэ, гражданскай сэрии хорсун разведчига Иван Иванович Константинов туһунан «Дэлэгээт Уйбаан» диэн кинигэ сүрэхтэниитэ буолан ааста.
Амма улууһугар өрөспүүбүлүкэҕэ бастакынан тэриллибит “Тэҥнэбил” тыа хаһаайыстыбатын артыала кэлин уларыйан Ленин аатынан буолан, Саха сиригэр биир саамай кырдьаҕас колхуоһунан биллэрэ. Бу ааспыт 2024 сыл сайыныгар колхуос тэриллибитэ 100 сыла туолбутун Сулҕаччылар үрдүк таһымнаахтык бэлиэтээбиттэрэ. Колхуос бастакы бэрэссэдээтэлэ Иван Константинов-Дэлэгээт Уйбаан туһунан сиэннэрэ эһэлэрин үйэтитэн кинигэ таһаардылар.
Кинигэ тахсарыгар матырыйаал хомуйуутугар үлэлээбит, СР үөрэҕириитин туйгуна, Таатта улууһун Тыараһа орто оскуолатын учуутала Рена Нотаровна Егорова кинигэ туохтан саҕахтанан күн сирин көрбүтүн кэлбит дьону кытта үллэһиннэ: «Ийэм куруук кэпсиир этэ эһиги эһэҕит биллэр-көстөр олорон ааспыт олоҕор устуоруйаҕа суолу-ииһи хаалларбыт киһи, ол онтон сиэттэрэн аан маҥнай уолум кэмпириэнсийэҕэ кыттарыгар «Мин киэн туттар киһим» диэн эһэтин туһунан дакылаат суруйбуппут, ол үлэбитин салҕаан, бырааппын, аймахтарбын бары туруоран, матырыйаал хомуйан бүгүн бу кинигэ буолан тахсыбытыттан үөрүүбүт үгүс».
Кинигэ биһирэмигэр Иван Константинов кийиитэ, Чурапчы улууһугар «Үөрэҕирии сайдыытыгар кылаатын иһин», «Улэҕэ туйгунун иһин» бэлиэлэр хаһаайыннара, 85 саастаах сэрии сылын оҕото Ликерия Алексеевна Константинова ахтыытын иһиттибит.
Биир дойдулааҕын Дэлэгээт Уйбаан туһунан ахтан-санаан ааста СӨ норуот хаһаайыстыбатын үтүөлээх үлэһитэ, Амма улууһун баһылыгынан, тыа хаһаайыстыбатын миниистиринэн, Ил Тумэн судаарыстыбаннай мунньах дьокутаатынан, үгүс сылларга салайар үлэлэргэ таһаарыылаахтык үлэлээбит, Саха Өрөспүүбүлүкэтин суруйааччыларын союһун чилиэнэ, норуодунай суруйааччы Дмитрий Наумов. Кини Дэлэгээт Уйбаан Сулҕаччыларга эрэ буолбакка, бүтүн Амма улууһугар суолталааҕын туһунан кэпсээтэ, түмүгэр Иван Констанинов бюстара эргэрбиттэрин, ону саҥардарга үлэ ыыттыллыахтааҕын туһунан эттэ.
Сулҕаччы устуоруйатын түмэлин салайааччыта Екатерина Михайлова кинигэ туһунан санаатын үллэһиннэ. Кинигэҕэ кини аҕата кыраайы үөрэтээччи Петр Михайлович Павлов «Сулҕаччы түөлбэтигэр», «Софрон Евграфьевич Кутургуин» кинигэлэриттэн Дэлэгээт Уйбаан туһунан үгүс суруйуулара киирбиттэрин бэлиэтээн эттэ. Түмэлгэ Иван Константинов докумуоннара, партийнай билиэтэ, сэриигэ ылалларыгар суруйбут сайабылыанньата барыта кичэллээхтик харалла сыталларын кэпсээтэ.
Тэрээһиҥҥэ Иван Константинов ыччаттара, сиэннэрэ, хос сиэннэрэ, ыраах-чугас аймахтара, биир дойдулаахтара кэлэн үөрүүлээх түгэни үллэһиннилэр.
Иван Константинов - Дэлэгээт Уйбаан сиэннэрэ Амма улууһун бибилэтиэкэтигэр, Сулҕаччы нэһилиэгин уонна орто оскуолатын бибилэтиэкэлэригэр, СӨ Национальнай бибилэтиэкэтигэр кинигэлэри бэлэх ууннулар.