Новости

Өрөспүүбүлүкэҕэ аан маҥнайгытын ыытыллар «Күн оһуохайа» күрэх кыттыылаахтара - барыта 15 улуустан талааннаах оҕолор Дьокуускай куорат «Сосновый бор» киинигэр муһуннулар. Бырайыагы СӨ Үөрэх министиэристибэтэ, СӨ Култуура уонна духуобунай сайдыы министиэристибэтэ, «Саха» НКИХ өйөөн тэрийдилэр. Бу бырайыак ааптара – Үөһээ Бүлүүтээҕи Оҕо ускуустубатын оскуолатын, Олоҥхо оскуолатын уһуйааччыта Айталина Мойтохонова-Сахаайта.

Тэрээһин үөрүүлээх аһыллыытыгар СӨ Култуура уонна духуобунай сайдыы миниистирин бастакы солбуйааччыта Афанасий Ноев ыалдьыттаата, ыраахтан-чугастан бырайыакка кыттар оҕолору кытта көрсөн, сүбэ-соргу биэрдэ.

«Тэрээһин кыттыылаахтара – оҕолорбут, кэлэр кэскилбит уонна уһуйааччыларбыт, оһуохайдьыттар! Айталина Михайловна Мойтохонова оһуохайдьыт оҕолору сүүмэрдээн, кинилэр талааннарын арыйан, күрэх оҥордорбун диэн хас эмитэ сыл илдьэ сылдьыбыт санаата дьэ туолан, бу араас улуустартан оҕолорбут кэлэн олороҕут. Ил Дархан Айсен Николаев Өрөспүүбүлүкэ 100 сыллаах үбүлүөйдээх сылыгар саха оһуохайдьыттарын, олоҥхоһуттарын, уустарын өйүүргэ анал истипиэндьийэлэри аныыр туһунан уураах таһаарбыта. Бу уураахха олоҕуран, сыл аайы 21 киһи анал истипиэндьийэ ылар буолла. Бастакы истипиэндьийэни оһуохайдьыттар, олоҥхоһуттар, тимир уустара номнуо ыллылар. Ситим быстыбатын, көлүөнэттэн көлүөнэҕэ тылбыт-өспүт, сурукпут-бичикпит уонна норуоппут баайа Олоҥхобут, оһуохайбыт бэриллэн истин диэн маннык быһаарыыны ылан турар. Учууталларгыт, уһуйааччыларгыт эһигини дьарыктаан, тэҥҥэ алтыһан сайыннарыахтара. Талааҥҥытын, искитигэр илдьэ сылдьар кыаххытын арыйыахтаахтар. Маннык тэрээһиннэртэн күүс-уох ылан, арыллан, сайдан иһиэххит буоллаҕа. Дьоҥҥутун-сэргэҕитин, төрөппүттэргитин, эбэлэргитин, эһэлэргитин, учууталларгытын уонна үөлээннээхтэргитин, сиргитин-уоккутун ытыктыыр, убаастыыр дьон буола улаатыҥ», - диэтэ Афанасий Иванович.

«Сосновый борга» кыһыҥҥы оскуоланы оһуохай этээччи, оһуохайынан дьарыктанар, оһуохайынан норуоппут баайын арыйан, кэлэр өттүгэр сайыннарыан баҕалаах оҕолоры кытта дьарыктанарга диэн анаатылар. Ити курдук Сунтаартан, Үөһээ Бүлүүттэн, Ленскэйтэн, Мииринэйтэн, Горнайтан, Амматтан, Тааттаттан, Уус Алдантан, Чурапчыттан, Кэбээйиттэн, Ньурбаттан, Бүлүүттэн, Хаҥаластан уонна да атын улуустартан оҕолор кэллилэр. 

«Күн оһуохайа» күрэххэ 87 оҕо кыттыан баҕалааҕын биллэрбит, хамыыһыйа көрөн, 45 оҕону күрэххэ кытыннарар. Атыттар бары «Сосновый бор» кииҥҥэ сынньаналлар, оһуохайга уһуйуллаллар. 45 оҕо түөрт сүүмэрдиир түһүмэҕи ааһар, кинилэри биэс уһуйааччы үөрэтэр. Тэрийээччилэр этэллэринэн, түөлбэ оһуохайыгар, уус-уран хоһуйууга улахан болҕомто ууруллар. 

Оһуохай күрэҕэ олунньу 13 күнүттэн 24 күнүгэр диэри ыытыллар, «Саха» НКИХ ханаалыгар көрдөрүөхтэрэ. Күрэх түмүктүүр түһүмэҕэ олунньу 25 күнүгэр «Саха» НКИХ ханаалыгар куоластааһын быһыытынан барыаҕа, манна 5 оҕо тахсыаҕа. Кыайыылаахтары дьүүллүүр сүбэ уонна куоластааһын быһаарыаҕа, маҥнайгы миэстэҕэ 100 тыһыынча бэриллиэҕэ.

СӨ Национальнай бибилэтиэкэтин Медиакиинэ