Балаҕан ыйын 30 күнүгэр СӨ Национальнай библиотекатын Историческай саалатыгар республика биир биллэр көстөр суруналыыһа, СССР уонна Россия суруналыыстарын сойууһун чилиэнэ, Саха сирин культуратын үтүөлээх үлэһитэ, Саха сирин бэчээтин туйгуна, Үөһээ Бүлүү улууһун Дүллүкү, Балаҕаннаах, Хомустаах нэһилиэктэрин боччуоттаах олохтооҕо Иван Васильевич Борисов «Коммунистар. Коммунисты” кинигэтин сүрэхтэниитэ буолла. Бу кинигэ Саха сирэ чэчирии сайдарын туһугар олохторун анаабыт өрөспүүбүлүкэҕэ биллэр партийнай советскай салайааччылар, сырдык тыыннарын толук уурбут Кыһыл Армия коммунист саллааттарын олохторун кэрдиис кэмнэрин сырдатар, сыралаах-сылбалаах үлэлэрин түмүгүн үйэтитэр сыаллаах-соруктаах суруллубут.
Кинигэ сүрэхтэниитэ Мэҥэ Хаҥалас улуустааҕы И.М Сосин аатынан Киин бибилэтиэкэтин үлэһиттэрин көҕүлээһининэн тэриллиннэ.
Кинигэ сүрэхтэниитигэр Иван Васильевиһы кытта өр сылларга бииргэ үлэлээбит, алтыспыт үөлээннэхтэрэ муһуннулар. Кэпсэтии бэрт сэргэхтик ааста, хас биирдии кэлбит ыалдьыт Иван Васильевич олус улахан суолталаах үлэтин түмүгэ күн сирин көрбүтүн биһирээтэ. «Кырдьаҕас хоммуньуус бэтэрээннэрбит үлэлэрин убаастаан туран кинилэр ааттарын үйэтитэр кинигэ тахсыбытынан эҕэрдэлиибин, кинилэр дойдубут сайдарын туһугар сүҥкэн кылааты киллэрбит үлэлэрин кэрэһэлиир бу биһиги көлүөнэ дьоно буолабыт, ол туһугар бары да үлэлиэхпитин наада»– диэн Люлия Николаевна Григорьева, Саха сирин норуотун хаһаайыстыбатын үтүөлээх үлэһитэ, Саха сирин өрөспүүбүлүкэтин бочуоттаах олохтооҕо Иван Васильевич үлэтин үрдүктүк сыаналаан тыл эттэ.
Ол курдук Иван Васильевич Саха сирин суруналыыстыката сайдарын туһугар үлэ үөһүгэр сылдьыбытын, кини сытыы бөрүөлээх суруналыыһын ааһан олус сатабыллаах салайааччы, үлэҕэ уһуйааччы, сирдээччи буоларын туһунан ахтан-санаан ааста Любовь Семеновна Аргунова, ССРС үөрэҕириитин туйгуна, Саха сирин үөрэхтээһиҥҥэ туйгуна, учууталлар Учууталлара, Саха сирин гражданскай килбиэн хаһаайката.
Марианна Афанасьевна Никанорова, Мэҥэ Хаҥалас улууһун И.М. Сосин аатынан Киин бибилэтиэкэтин дириэктэрэ эҕэрдэ тылын эттэ, Иван Васильевич сытыы өйүн, ытык сааһыгар дылы айа-тута сылдьар сөҕүмэр күүһүн-уоҕун холобур оҥостоллорун билинэн туран бэйэтин уонна үлэһиттэрин аатыттан эҕэрдэ сурук уонна Иннокентий Сосин төрөөбүтэ 95 сылыгар анаан «Алаас чэйэ» диэн Мэҥэ-Хаҥалас битэмииннээх отторуттан оҥоһуллубут чэйи бэлэх уунна.
Ааптар кинигэҕэ ахтыллыбыт дьоннуун бэйэтэ чугастык алтыспыт, билсибит буолан кинигэ ааҕааччыга икки тылынан сахалыы уонна нууччалыы олус умсугутуулаахтык тириэрдиллибитин бэлиэтиэххэ наада. Иван Васильевич тыл этэригэр кинигэҕэ киирбит хоммунньуустары кытта үлэлээн-хамсаан ааспыт сылларын ахтан-санаан ааста. «Мин суруйан хаалларбыт кинигэлэрим олорон ааспыт олоҕум кэрэһиттэрэ буолуохтара, ааппын ааттата туруохтара диэн эрэнэбин» - диэн түмүктээтэ Иван Васильевич.
Тэрээһиҥҥэ анаан Национальнай библиотека пуондатытттан Иван Васильевич кинигэлэрин быыстапката турда.
СӨ Национальнай бибилэтиэкэтин Медиа киинэ.